Kondolanseprotokoll lagt ut på kommunehuset i Valle

Ole Birger Lien

Med meldinga om Kongens bortgang går Noreg inn i ein sørgeperiode fram til etter gravferda. Dette vil naturleg nok prege samfunnsbiletet. Det blir i dag og fram til gravferda flagga på halv stong frå alle kommunale flaggstenger. 

Opne kyrkjer

Klokka 12-13 i dag ringer kyrkjeklokkene i heile landet.  Valle kyrkje er open i dag frå klokka 12-21. Hylestad kyrkje er også open til klokka 21 i kveld. Kyrkjene er vidare opne kvar dag frå klokka 10-21 fram til gravferda. Det ligg ute kondolanseprotokoll i båe kyrkjene. 

Så normalt som råd for born og unge

Skular og barnehagar har normal drift i sørgeperioden. Det er meininga at arrangement og aktivitetar for born og unge skal gjennomførast så normalt som råd. Ved arrangement elles må arrangøren ta ei vurdering på om det høver seg å gjennomføre i sørgeperioden. Regjeringa har utarbeidd ein rettleiar til hjelp for arrangørar. 

Her finn du rettleiaren

Har ein spørsmål om eller ynskjer hjelp i vurderinga kring eit arrangement, kan ein vende seg til beredskapskoordinator i Valle kommune, Gunn Marith Homme på tlf 91837000.