Stor oppslutning om språkkafé på Valle kultursenter

Frå språkkafé i Valle. Rundt næraste bord frå venstre: Kari Trydal, Viktoriia Zaporozhchenko, Yelizaveta Zadvorna, Vladyslav Zadvorny, Martin Nilsen, Julie Iversen Solheim, Maksym Zadvorny, Olena Volodymyra og Ollie Amadeus Kiland Rysstad. Birgit Homme Harstad

Språkkafeen er ein stad der menneske kan møtast på tvers av språk, bakgrunn og alder. Her handlar det ikkje berre om å lære og øve på norsk, men like mykje om å bli kjent med andre, delta i lokalsamfunnet og ha det hyggeleg saman. Denne kvelden stod også eit felles måltid sentralt. Deltakarane fekk servert sodd med kjøt og grønsaker, og etterpå vart det kaker. Rundt borda vart det god tid til å prate saman og bli betre kjende. Martin og Rebecca frå frivilligsentralen hadde stelt i stand til språkkafeen og lagt til rette for samlinga. Birgit stod for kveldens bingo, som vart eit populært og humoristisk innslag. Det vart mykje latter og god stemning då bingotala vart lesne opp og deltakarane følgde spent med på bretta sine.

Oppslutninga imponerte

Det som kanskje gjorde størst inntrykk denne kvelden, var kor mange som hadde funne vegen til kultursenteret. Når mange menneske møtest på denne måten, blir språkkafeen meir enn berre ein stad for å øve på språk. Han blir også ein arena for fellesskap, nye møte og inkludering. Valle kultursenter viste seg å vere ein svært god stad for ei slik samling. Det var flott å kunne møtast i gode lokale og fylle kultursenteret med samtalar, aktivitet og sosialt samvær. Etter ein vellukka kveld er håpet at dette ikkje blir den siste språkkafeen på kultursenteret. Den gode oppslutninga viser at det er interesse for slike møteplassar, og ønsket er å få til fleire språkkafétreff framover. Når folk møtest rundt same bord, et saman, pratar, ler og deltek i aktivitetar, blir det også lettare å bli kjent. Språkkafeen kan på den måten vere ein liten, men viktig møteplass for å skape tilhøyrsle og fellesskap i Valle.